كيف اصبحت طالب فى ITI

تفاصيل التقدم والقبول بITI والدراسة خلال المنحة

By Kareem Kamal - 24/3/2018

مقدمة

التفاصيل التالية تتضمن من اول المنحة حتى الان, لسا باقى 3 اشهر من اجمالى 9, احتمال يكون فى جزء تانى يحكى تفاصيلهم.

انا اسمى كريم كمال, خريج معهد ابوقير للحاسب الالى ونظم المعلومات بالاسكندرية دفعة 2013 بتقدير جيد, بعد التخرج اشتغلت ممثل خدمة عملاء ورغم معرفتى بالاى تى اى مكانش فى دافع كافى انى اقدم وخصوصا انى مكنتش حاسس ان فى حاجه بتميزنى عن بقية الناس اللى مقدمة وبالتالى مفيش سبب يتم اختيارى على اساسه.

فى 2015 قدمت اوراقى ونويت اقدم فى المنحة وكان ميعاد اول اختبار هو نفس ميعاد انترفيو شركة ساذرلاند كممثل خدمة عملاء, وفى الوقت دا لنفس السبب اللى ذكرته فضلت انى اقدم فى ساذرلاند واتكتب فى الصفحة الخاصة بيا على موقع اى تى اى انى فوتت الامتحان وقولت وقتها انى بلاك ليستد ومش هيقبلونى تانى عشان مروحتش.

فى 2016 بعد تلات سنين من الشغل فى كول سنترز جاتلى فكرة انى اعمل خدمة دليل موجود فيه كل المصورين والميك اب ارتسيت اللى على الفيسبوك ويكون متاح على النت وفيه تقييم للناس دول وصور لشغلهم على اساس انه يكون هو الماركت اللى بيتحكم فى المجالات دى من غير ما يكون فى كام حد معروفين هم اللى الناس بتروحلهم ومفيش مجال لحد جديد انه ينجح.. وكانت معلوماتى عن البرمجة قليلة جدا وبدات اتعلم من خلال الفكرة اللى بنفذها.. وفعلا نفذتها والموقع لسا موجود حتى الان وهو setch.me ولما فضلت شهور اشتغل عليه رجعت فكرة ITI وكانت 2017 هى اخر سنة اقدر اقدم فيها.

مرحلة التقديم

قررت اقدم فى 2017 بالرغم من انى تزوجت قبل بداية التقديم بشهور.. لكن بتشجيع من زوجتى قررت مفوتش الفرصة الاخيرة وقدمت اونلاين بعد فتح باب التقديم بـاربع ايام.. وبعدها بكام يوم اتكتبلي ميعاد امتحان الانجليزى والاى كيو اللى كان بعد حوالى اسبوع من اليوم اللى قدمت فيه اونلاين.. والورق كان هو نفسه اللى قدمته فى 2015 مراحش من الموقع ولا اتعملى بلاك ليست ولا حاجه.

فى امتحان الانجليزى والاى كيو كنت قريت بعض الماتيريل اللى كانت موجوده فى جروبات على فيسبوك للاى كيو ومقريتش حاجة فى الانجليزى لان مستوايا كان كويس فيه بحكم شغلى, الامتحان كان ساعة اى كيو و اربعين دقيقة انجليزى بيكون على الكمبيوتر وفى شخص بيراقب.. وعموما اغلب الناس بتعدى من المرحلة دى وبتروح على اللى بعدها.

انترفيو التكنيكال والاتش ار

وفعلا بعد ايام من الامتحان ظهرت على الموقع النتيجة انى نجحت فى الامتحان وفى انتظار ميعاد الانترفيو.. ومكانش فى تحديث لمدة اسبوعين تقريبا لحد ما اتحددلي ميعاد انترفيو تكنيكال واتش ار.. فى الانترفيو دا كنا كلنا لابسين فورمال وبننتظر وبيتنادى علينا بترتيب الحضور حسب الميعاد اللى كان على الموقع..

اول انترفيو وهو انترفيو الاتش ار كان مع الاستاذة ايمان البندارى اللى عرفت اسمها بعد كدا, كانت بشوشة جدا وطلبت منى اعرف نفسى بالانجليزى وبعدين سالتني مقدمتش ليه فى السنين اللى فاتت, اتكلمت كتير فى الاجابتين ومكنتش متوتر وهى قالتلي شكرا ومسالتش الاسئلة اللى كنت بسمع عنها زى استخدامات الجومة (الاستيكة), ومكنتش فاهم قلة الاسئلة دى حاجه كويسة ولا وحشة لكن من الواضح انها كانت حاجة كويسة.

تانى انترفيو كان انترفيو User Interface Design ودا كان مع مهندسة مروة ومهندسة غادة, كنت داخل ومعايا السى فى فيه لينك للبورتفوليو اللى انا عامله وفيه الحاجات اللى عملتها السنة اللى فاتت والموقع بتاعى.. دخلو الموقع وعملو inspect وسالونى فى حاجات فيه, وسالونى لو كان فى لوجو او حاجه عاملها فى الجرافيكس وكان فى بس مكنتش متوقع السؤال فمكانتش معايا, وفى الاخر حسيت انى رديت بشكل مناسب على اغلب الاسئلة اللى اتسالتها وكنت متفائل بالانترفيو.

اخر انترفيو كان Open Source مع مهندس محمود عوف مدير التدريب وكنت مقدم فيه لانى حابب اكون backend developer لكن كنت مخليه تانى رغبه لان خبرتى فيه كانت ضئيلة جدا.. وفعلا دخلت واتسالت اساله عامة عن الاوبن سورس وايه هى اكتر الادوات استخداما فى تطبيقات الاوبن سورس ووقتها رديت وقولت Adobe Dreamweaver وهو اكيد كان يقصد GitHub اجمالا كنت جاوبت على سؤالين تلاته بس والباقى قولت مش عارف.

النتيجة

وبعد انتظار عرفت النتيجة وانى اتقبلت.. وروحت اول يوم وهو كان يوم تعريفي كان فيه video conference مع القاهرة وكلام تشجيعى من مديرة المعهد دكتورة هبة صالح وجابت مثال لواحد من دفعة السنة اللى فاتت عمل ستارت اب بتعمل تطبيقات Virtual Reality وناجح جدا وبعد الـVideo Conference كملنا مع المهندس محمد برغش واتكلم عن نظام المعهد وبعدين كل تراك اجتمع بمشرفه وكانت مشرفتنا مهندسة مروة عرفتنا الكورسات اللى هناخدها وكان عددنا 38 بالاضافة لواحد اتقبل ومجاش لكن مجابوش حد مكانه من قائمة الانتظار.. مسمعتش عن حد دخل من ويتينج ليست الا واحد بس.

نظام الدراسة

الدراسة فى ITI بتكون محاضرات كل يوم, عادة الجمعة والسبت اجازة لكن اغلب الاوقات الاجازة بتتلغى.. المحاضرين اغلبهم كانو فى الاى تى اى وحاليا بيشتغلو فى شركات فبينقلولنا خبرة حية من بيئة العمل.

الدراسة بتكون منقسمة لمحاضرات ولابات.. كل طالب مطلوب منه يكون معاه لاب توب.. المحاضرات شرح وبعدين تطبيقها فى اللاب.. كل مادة بتكون عدد محاضرات معين.. مثلا ال JavaScript كانت حوالى 10 محاضرات و 10 لابات بينما حاجه زى Adobe Audition وهو مش حاجه اساسية فى التراك كانت محاضرتين ولابين بس.

فى نهاية كل كورس بيتطلب مننا تقييم المحاضر.. وعلى اساس التقييم بيتحدد اذا كان هيكمل معانا ومع السنين الجاية ولا لا, وخلال الكورس ايضا لو فى مشاكل فى الشرح ممكن فى اى وقت نتكلم مع مهندسة مروة مشرفة التراك وتتواصل هى مع المحاضر.

عموما فكرة ان الناس اللى بتيجى تشرح بيكونو فى شركات بيشتغلو عملى فى الحاجة اللى جايين يشرحوها هى اكتر حاجة بتميز الـ ITI.

كل كورس كمان بيبقى ليه اما امتحان او بروجكت او الاتنين بيتحدد على اساسه درجات الكورس.. المحاضرات واللابات مدتهم تلات ساعات عادة بيكون فى اتنين فى اليوم وبنمشى 3 ونص وفى بعض الاحيان بيكونو تلات محاضرات وبنمشى 7.

وحاليا احنا على اعتاب نهاية فترة الكورسات واللى هتنتهى فى اخر ابريل واخر شهرين بيكونو لمشروع التخرج.. الفترة الجاية هيكون فيها انترفيوهات وتحضير لسوق العمل, هيكون فى Job Fair هتيجى فيه شركات السوفت وير لـ ITI وتختار من الناس.

الخلاصة ان ITI تجربة لا مثيل لها فى مصر, من شانها انها تغير حياة اى شخص للافضل, وانصح كل شخص انه يسعى باقصى جهده انه يزود من قيمته من خلال استعداده ومعلوماته عشان يكون ليه فرصة اكبر ويتقبل ان شاء الله.